muel

Muel, m. acut. Est un instrument directoire à maçon, duquel il se sert pour plomer, c. pour juger la droicture de sa maçonnerie, autrement appelé plomb à ruyle, et est fait d'un ais tenve, large de quatre doigts, long d'environ deux pieds, du hault bout duquel, droict par le milieu pend une ligne, au bout de laquelle est attaché un plomeau fait en clochete, lequel bat dans une osche et ouverture faite au bas bout de ladite ruyle ou ais, et luy sert pour plomer ce qui est de maçonnerie sans plus. Car au plomer des fenestrages et cueillerées d'iceux, et des huysseries, et des jambages et manteaux des cheminées, il use du plomb à chaas, avec lequel il cognoist s'il y a du frit ou non. Monstrelet livr. 1. chap. 59. Le Duc de Bourgongne donna en estrenes des joyaux faits à semblance de ligne, qu'on appelle Muel de maçon, tant d'or comme d'argent d'oré, et au bout de chascun muel pendoit une chainete dorée a la semblance d'un plomet, en signification que ce qui estoit mis par indirecte voye seroit mis à plomb et à son rieule et droite ligne de raison, voyez Plomb à chaas. Et est dit Muel, par ce que ledit plomb en plomant se remuë et branle tant qu'il soit en son droit arresté.

Thresor de la langue françoyse. Jean Nicot.